همایل به شونسه اگوی پیایه
تَرک اسب سواره و داره اِیایه
جانشین خانِ و اسبس به زینه
 تفنگس به شونسه، هیچ نی نشینه
تیر انداز، وزنه سوار، گُرد و دلیره 
به خدا مِن بختیاری، بی نظیره
نکته دون و میلسی بید و سخنور
مِنبَرِن، به پا ای کِرد سی حفظ کشور
اسلحه به دس گِرید، سی فتح پاتخت
ریشه کن کِرد با گووس قزاقنه سخت
پشت اِدا پشت گوو با زور و با جوو 
سردار ایلس اوی با فتح تهرو
صد سوار زُوال او، صد تا به زیر دست
هیچ زمون به دشمنا ایران نپیوست
نشون داد به دشمنون زنگل چی گُردن
قزاقون با صد سوار تیس کم اوردن
پشت به پشت، سردار اسعد جنگی سی میهن
پـایـتـخـتـنـه، ز فـتـنـــه کِــــرد ایمــــن
بی مریم دُدَر خان اگوی پیایه
لایق سرداری و تمثال شایه
تش و دیس روشن اوی با علیمردون
شیر جنگی، رستم و گُرد دلیرون
نه فقط سی بختیاری افتخار بو
سی تمومِ مملکت، اویــده الگو
افتـخار کشـــورن زنگل ایلُـــــم
ایلِ صاف ســاده و پاک و اصیلُم
تخت فولاد اصفهان نازه به خاکس
بی مریم دفن اوچو با روح پاکس
سراینده:آمنه نقدی پور
 
این هم شعر با گویش بختیاری در مقام بی بی مریم بختیاری  دختر حسینقلی خان ایلخانی، خواهر سردار اسعد و مادر علیمردان خان